睇「婦科聖手」求子熊黛林為生B四出尋秘方

【蘋果日報】下月便踏入37歲嘅熊黛林（Lynn），自舊年3月收郭可頌3卡鑽戒後，於同年9月初入紙排期，雖然兩人結婚一切從簡，只係喺Lynn經理人Kin見證下簽紙註冊，但佢哋由始至終都係咁sweet同恩愛。而成為郭太後嘅Lynn，不諱言婚後不設防，會落力「造人」。
Lynn喺婚後不時被問到幾時有喜訊，佢直認有睇醫生調理身體同戒口，減食海鮮同凍嘢，又獲身邊朋友介紹生B秘方，至於生仔生女更係無所謂，佢話：「最緊要快，仔女冇所謂，老公身體不嬲好，我自己做呢行食冇定時，身體差啲。」」Lynn更指喺有小朋友後，願意為子女減少工作。
其實Lynn婚後不時被發現去睇醫生，其中喺今年2月嗰一次，Lynn睇嘅更係有「婦科聖手」之稱的中醫劉逢吉，當日由郭可頌及另一女友人陪同，郭可頌更做廿四孝老公，負責攞藥同買藥煲。而喺一星期後，Lynn再喺老公陪同下再求診，郭可頌更坦承係陪太太睇醫生求B，可見佢哋都好心急。
除咗戒「違禁品」，一向身形纖瘦嘅Lynn疑似為生B食多咗，養肥自己準備做媽咪，而Lynn喺今年初佢出席公開活動時，明言想生龍鳳胎：「最多生兩個，一個BB一間房，要別墅先得，o依家3間之嘛。」，又喺另一場合講到明雞年要努力造人。
希望Lynn早日報喜啦！