中環在線：OK便利店母企賣埋眼鏡半個鐘有得攞

【蘋果日報】馮國經家族旗下的利亞零售（831），除咗經營OK便利店和麵包店聖安娜外，來緊又多瓣新業務了，今次係轉行賣眼鏡！原來利亞早前同日本平價連鎖眼鏡店Zoff（佐芙）的母企Intermestic，簽咗長達20年既特許經營權協議，利亞3個月內就會喺太古城開香港首間約1000呎的Zoff分店，利亞行政總裁楊立彬（Richard）噚日同華華講，計劃2至3年間會喺香港開到最多30間分店，認為呢類「快速」眼鏡市場有得做喎！
不過Richard就提醒大家，Zoff同OK便利店係分開營運架，所以係唔會出現喺OK便利店內配眼鏡嘅情況嘅。
查實Zoff喺日本全國都有分店，喺百貨公司亦不難發現Zoff嘅蹤影，佢最大特色係由驗眼、配眼鏡至到拎貨，成個過程只需大約半小時，堪稱係「Fast fashion」嘅眼鏡版，加上款式夠多，一向深受唔少後生仔歡迎。
Richard話，Fast Fashion應用喺衣服就多，但眼鏡喺香港暫時未見，加上Zoff嘅質量好，認為可以為利亞帶來貢獻，仲話香港Zoff眼鏡店將會同日本經營模式相似，每副眼鏡售價大約600蚊至900蚊不等。
李華華
LiWaWa@AppleDaily.com