中環在線：畢馬威助外傭姐姐惡補金融知識

【蘋果日報】文盲（Illiteracy）有唔同層面，喺香港地，如果財務知識唔足夠，都可以好大傷害。畢馬威今年決定幫外傭姐姐上堂惡補金融知識，掃走理財文盲咁話。
畢馬威慈善基金今年就首次同非政府組織Enrich合作，從10月7日起舉辦金融知識工作坊，姐姐會學到基本財務管理、高息存款選擇、保險，同埋大耳窿、幫人擔保借錢嘅風險、被人Sell產品嘅話有咩要注意嘅地方等等。
畢馬威中國企業社會責任合夥人吳柏年（Pat）慨嘆，唔識得財務管理可以話係貧窮嘅根源，就算派飯、捐錢，好多時治標不治本，而且香港嘅少數族裔比較少接觸理財知識，面對財務挑戰就更加無助，希望一連9堂工作坊，可以幫到佢哋。工作坊暫訂每班50至60人，分開菲傭（英文班）、印傭（文班）上堂，畢馬威會貢獻埋銅鑼灣Office，等姐姐舒舒服服上堂。
另外，基金從2010年開始，已經同苗圃行動合作，贊助後者喺內地興建希望小學，幫貧困、弱勢嘅青少年返學，今年將會喺雲南興建第四間小學「忙籠村畢馬威苗圃希望小學」，之前三間都係位於甘肅、雲南，畢馬威除咗贊助重建殘舊校舍，每年亦有100至150個義工同事幫手義教。
李華華
LiWaWa@AppleDaily.com