55萬元裝修　淘出田園風家居

【蘋果日報】【周日專題】提起田園風，不少人都會聯想起花哩花碌。不過，想小小蝸居住得舒服又合心意，一言以蔽之，設計要平衡。今次介紹位於荃灣麗城花園的單位雖然花蹤處處，但置身其中不覺過份花巧，靚得來順眼寫意，秘訣盡在特色牆比例。
客飯廳四幅牆，一幅花俏的特色牆就夠晒數，配合其餘3幅淡灰白色的牆身，不但令單位更光猛，設計師李家俊（Henry）提醒，「用純白色牆身會睇落冇咁舒服，用一啲off white，比較暖灰色嘅顏色，可以做到少少luxury效果」。嫌白色太多單調，加花線點綴，牆身就更富立體感。
當然想靚是要付出，「單位裝修、連水電，總共花約55萬元，其實最貴係啲木器，因為要做牆身花線，一定要先做個木板底」。
裝修用料講究，想慳錢就要由家具入手，設計師悉心於淘寶搜羅優質家具，「呢個電視櫃你淘寶連埋運費，都係4、5千蚊，但如果你喺香港搵師傅訂做，就可能都要過萬啦」。
飯廳睡房「花花牆」呼應
講到luxury，設計師特別為飯廳設計卡位，一坐下就有如到英式花園Fine Dining。飯廳與睡房的「花花牆」互相呼應，巧妙地將兩個空間連貫，和諧度即時提升。
配色要平衡之餘，設計師特別於廚房後加裝一個全高的組櫃，不單令原本不對稱的客飯廳，變得更為工整；同時增加收納空間。
單位面積470方呎，原則為一個兩房單位；但對一對夫婦而言，打通兩房更為實際，空間更見使，加裝衣帽間亦無問題。
記者：倪敏慧