欠機會轉戲路

【蘋果日報】大半演藝生涯都貢獻在動作電影的惠英紅，事實上早在《Mrs K》前，紅姐已逐漸改變戲路，更憑《心魔》和《幸運是我》兩奪影后：「我不嬲對自己好有信心，只係變咗武打演員後，人人都覺得呢一樣係賣錢，於是你淨係畀心機打就得啦，唔使做其他嘢，所以你根本冇機會去演繹。」


紅姐表示演技並不是一下子就有：「我唔會突然間行番出嚟一年，你就覺得我脫胎換骨，只不過係你撞到唔同嘅劇本，我以前拍戲都有提議導演場戲可以點演，但永遠都係同我講唔使啦，你畀心機打啦，觀眾淨係鍾意睇你打，導演嘅角度就覺得係褒獎，但我自己就覺得係被貶低。」


而今次《Mrs K》，紅姐認為動作場面及角色的內心演繹上，達到一個平衡：「同華哥（任達華）合作過好多次，佢今次係好霸氣好搶鏡，至於同伍佰就好大反差，始終台灣人節奏慢啲，感覺佢好溫柔，好有自己風格。」