知己知彼：度縮公司冇發圍

【蘋果日報】 近期有朋友向筆者訴苦，講到香港某start-up做嘢做到好無癮，公司一味想同員工講心唔講金，講到底同剝削冇分別。 話說A公司係幾出名嘅fin tech公司，成立咗兩三年仲叫自己Start-up。據朋友所講，A公司辦公室係就係整到幾靚，不過金玉其外，敗絮其中。老闆度縮，明明有錢賺，仲想打住start-up旗號，喊住冠冕堂皇嘅口號，叫員工一齊捱。有google咁嘅辦公室又如何，但留唔到人才。 友人大數A公司幾大罪狀。首先，請人一定請啱啱畢業嘅新鮮人，方便壓價，入職已低過行業平均水平。第二，年尾遲出花紅，而每年四月的薪酬調整，實行拖字訣，為乜？等啲人錯過跳槽最佳時機。好啦，去到七月終於加人工啦，加咗仍然跑輸大市。最後係，公司永遠唔會請夠人，一個人奉旨頂兩個人嘅工作。 成日諗住點將員工使到盡，想透過壓榨員工而賺錢嘅公司係唔會發圍。因為留唔住人才，有能力嘅一定會跳槽。友人訴完苦第二日就炒咗老細魷魚，遞信嗰陣，個老細仲喺度講公司將會係下一個google以挽留員工。想做google？首先睇下google點對員工先啦。 風吹知