港產川金絲猴樂奇愛「掹尾」

【明報專訊】首隻喺香港誕生嘅川金絲猴今年4月中於海洋公園出世，最近川金絲猴寶寶終於都有名喇，佢叫「樂奇」，代表樂天好奇。Emily睇過公園發放嘅片段，樂奇真係猴如其名，活躍好動、好奇心旺盛，試過係咁掹住成年嘅川金絲猴條尾嚟玩，玩到跌咗落地下。


樂奇4月17號出世，海洋公園上個月搞咗一個命名活動，等公眾喺4個候選名「樂奇」、「森森」、「洋洋」及「珍寶」中投票，「樂奇」呢個名最終得票54%。海洋公園護理員就幫樂奇改咗個英文名「Lokie」。


樂奇家由媽媽餵哺，超級活躍又調皮，最鍾意喺樹叢同石頭間爬嚟爬去，Emily睇片時就見到佢拎住條樹枝係咁咬，又係咁掹住成年嘅川金絲猴條尾嚟玩，仲自己揈埋落地，畀佢笑死。