出動心穎BB 港鐵推高鐵廣告 未提一地兩檢

【明報專訊】高鐵香港段「一地兩檢」方案預料最快呢個月底公布，港鐵噚日起展開高鐵宣傳攻勢，推出兩條名為《高鐵零距離之「速」勢待發》嘅廣告，宣傳高鐵效益，其中港鐵總經理（高速鐵路）鄧維勇化身Simon sir，伙拍被網民稱為「心穎BB」嘅港姐黃心穎一齊介紹高鐵工程進度。


港鐵推出嘅兩條廣告短片每條大約1分鐘，都係強調番高鐵整體工程已經完成咗超過九成，會朝住出年第3季嘅通車目標推展工程，以及宣傳由西九總站上車可無需轉車，直接到達廣州、全程車程48分鐘等呢啲大路信息。不過兩條短片都無提及「一地兩檢」四隻字，可能港鐵想留番等政府自己公布啦。


鐵路人流料4年後多40萬

除咗高鐵即將完工，運房局噚日向立法會提交《公共交通策略研究》嘅資料提到4年之後，即係2021年乘搭港鐵重鐵網絡嘅市民會增加至每日510萬人次，突破500萬大關，比2016年嘅470萬人次多出40萬人次，亦都係各類公共交通工具之冠，反而預料乘搭專營巴士同渡輪嘅市民會下降。至於每日整體乘搭公共交通嘅市民，亦會由2016年嘅1260萬人次，增加至2021年嘅1320萬人次。