張建宗讚實習生有見地 邀一齊出動

【明報專訊】每逢星期日，唔少官員都化身鍵盤戰士寫網誌講吓政府政策，噚日政務司長張建宗就講吓青年，除咗花唔少篇幅講吓特首林鄭月娥上星期三宣布嘅教育措施外，亦提到政府為青年人提供向上流動機會，又提到最近辦公室內嚟咗5個實習生，大讚佢哋性格開朗、充滿活力同創意，亦好有見地。張建宗話佢已邀請呢幾個實習同學同佢一齊出席公開活動，等佢哋了解司長工作之餘，佢都希望從中聽吓年輕人心聲。


張建宗喺網誌度數吓政府有咩青年措施，好似推出多項內地同海外交流、實習、工作假期、在職培訓同師友計劃，擴闊佢哋視野；又資助本港青年到「一帶一路」沿線國家交流，等佢哋親身了解呢啲新興市場嘅前景同機遇，促進跨地域文化交流。張建宗又話，3批青年學生今個暑假分別會去甘肅敦煌、四川臥龍同北京故宮博物院交流實習，學習文化遺產同自然生態保育知識。