齊集教堂崇拜 林鄭伙六宗教代表為港祈福

【明報專訊】崇拜係基督教教會嘅每周活動，噚日聖公會聖約翰座堂舉行由聖公會教省主教長鄺保羅大主教帶領嘅「燃亮香港」感恩崇拜，出席者包括咗六大宗教代表（基督教、天主教、伊斯蘭教、孔教、道教同佛教），仲有特首林鄭月娥，道士、和尚、伊斯蘭教士及基督徒同台，咁嘅陣容一齊為香港祈禱祝福，好似都比較罕見。
回歸20年活動 逾400人出席
呢個感恩崇拜原來係回歸20周年活動，由宗教領袖及林太一齊燃點燭光，祈願和平同愛臨港，崇拜有超過400人出席。崇拜開始時，鄺保羅喺禱告中向上帝獻感恩，感謝上帝賜祝福畀港人，又為香港、國家同世界祈禱，並安排3個代表（一名年輕人、一名成人及一名長者）分享佢哋眼中香港嘅美好事物。
天主教、基督教嘅代表又輪流帶領參加者祈禱，「主場」嘅聖公會隨後就邀請出席嘅各宗教領袖及多名總領事代表等燃點3支象徵「信、望、愛」嘅蠟燭，祈求港人以平安嘅心生活等，而林太就燃點第4支、印有洋紫荊圖案嘅蠟燭。聖公會聖約翰座堂喺7月期間會擺放一支聖燭及為香港撰寫嘅禱文，歡迎公眾一齊為香港祈禱。
Emily好奇，唔同宗教都有各自嘅儀式，宗教代表出席今次崇拜時有無「入鄉隨俗」一齊禱告？據知其他宗教代表主要都係參與，但點燭儀式時，大家可以用各自方式祝福香港。