摩通劉伯偉加入上市委員會

【明報專訊】上市委員會噚日換屆，榜上有名嘅有摩根大通香港全球投行業務主管劉伯偉（David），小琴當然第一時間打電話恭喜佢啦，David就笑笑口咁話希望推動香港金融發展與時並進，又特別提到關心同股不同權問題，話1980年代至今已經有翻天覆地嘅變化，香港唔可以停留在40年前。


雖然David無透露係咪有成員邀請佢申請，不過上年佢喺上市架構改革諮詢咁高調維護上市委員會，相信成員都會好期待同佢合作啦！

除David加入負責審批新股嘅上市委員會，新加盟仲有證監會旗下、公眾股東權益小組委員馬自銘，同埋私募基金KKR公司顧問華裕能，接替期滿卸任嘅主席Taylor Stephen、委員陳永德與周翊祥，新主席係2014年獲委任嘅畢馬威香港區主管合伙人韋安袓。


[小琴密語]