卸任返港 陳馮退休最想陪屋企人

【明報專訊】6月底卸任嘅世界衛生組織前總幹事陳馮富珍（圖）正準備搬返香港定居，唔少人都八卦佢嘅退休大計。不過2003年已經到世衛工作嘅陳馮富珍就話，自己離開家人14年，8月份就滿70歲，卸任後最想「休息一下」，「第一願望」梗係陪多啲家人。


其實特首選舉期間，陳馮富珍一度成為傳聞裏面中央屬意嘅人選，唔知佢今次返香港，有無打算利用自己豐富嘅行政經驗出山協助新政府，例如加入委員會提供意見？佢回應話「無諗呢啲問題住啦」，到「年底都唔會考慮做任何嘢」。不過佢透露，有唔同國家、地區組織都曾經向佢發出邀請，包括叫佢去演講等，排到2019年都有，但佢都一一拒絕，又話卸任後唔多想接受訪問，因為「不在其位，不談其政」。


但係陳馮富珍就大讚新任特首林鄭月娥「有幹勁、有理想」，話喺衛生署嗰陣大家曾經共事，有親身感受，又話留意到林太一上場就不斷落區，開局「開得好好」。