行會成員旁聽 滿意林鄭表現 湯家驊重返立會周圍騰

【明報專訊】噚日係新任特首林鄭月娥首個立法會答問大會，新一批行政會議成員都有到立法會旁聽捧場，包括金管局前主席任志剛、安老事務委員會主席林正財、民建聯葉國謙、科技園主席羅范椒芬等。對於林太表現，佢哋感到滿意，林正財更豎起大拇指表示讚賞。咁難得嘅場合，點解唔見行會召集人陳智思嘅？Emily聽聞原來佢離港公幹，無緣見證林太嘅「處女秀」。
前年辭去議席而告別立法會嘅湯家驊（Ronny），噚日以行會成員身分重返會議廳，形容心情「甚為開心」，可以同相熟嘅保安員、記者打招呼。答問大會後佢仲興致勃勃到會議廳外行一圈，同前黨友、唔同議員打招呼傾偈。
不過，對於昔日徒弟、公民黨黨魁楊岳橋向林太要求就《基本法》22條立法，禁止中央部門干預香港內部事務，Ronny就唔多留情面批評，佢話大法官胡國興喺特首選舉期間提吓呢項建議，可以理解係競選口號，不過「如果有法律背景嘅人認為，22條在港需立法，我係感到少少詫異」。