科大機械人隊又奪冠 女將增

【明報專訊】科大機械人隊「火之龍」喺上月中舉行嘅全港大專生機械人大賽又拎冠軍，係歷年嚟第8次。Emily聽聞，科大今年嘅女隊員係歷屆中最多，而且全隊隊員背景非常國際化，佢哋嚟緊8月會代表香港出戰喺東京舉行嘅「亞太廣播聯盟機械人大賽2017」，同亞太區大專隊伍爭奪王者寶座。


科大不時喺全港大專生機械人大賽攞獎，今次佢哋就分享少少致勝之道。「火之龍」28名隊員中有8個係女仔，一年級工學院女生廖倩緹話，覺得男生嘅數理工科表現唔會因為性別而有優勢，女生喺機械人隊中嘅貢獻同男仔一樣咁出色！


除咗女生較以往多，科大機械人隊亦係各大專院校中最國際化嘅隊伍，28名隊員中有8名非本地生，包括7名國際學生及1名內地生。其中國際生、法國印度混血兒Thomas Rohit Narayana Swamy已經入隊兩年，佢話始終覺得亞洲係世界發展嘅火車頭，就揀咗嚟香港，唔同文化嘅人走埋一齊真係特別多火花。


隊長廖致忻話，其他院校嘅隊伍通常由四年級生擔任隊員，相信年輕都係佢哋一種優勢，「我哋團隊十分年輕，11人係一年級生、16人係二年級生、1人係三年級生」。