下月消防參觀日 百勝角模擬鐵路站首開放

【明報專訊】將軍澳消防及救護學院會喺8月6日舉行開放日，百勝角模擬鐵路站亦首次開放畀公眾參觀。消防處本周六（8日）會派發6100張公眾入場券，有興趣嘅市民密切留意喇！


開放當日有消防同救護車巡遊、多項滅火及救援示範，亦有訓練設施展覽、防火安全教育展覽、攤位遊戲、互動投考體驗區同消防工作犬示範等。除咗首次開放嘅百勝角模擬鐵路站，消防及救護教育中心暨博物館都會畀市民參觀。


周六4地點派飛

開放日參觀時間由上晝9點至下晝4點，市民需憑票入場，可以喺周六到上環消防局、黃大仙消防局、沙田消防局，或者消防及救護學院呢4個地點索取入場券，派發時間由上晝10點開始，每人限取兩張，先到先得。如果想查詢開放日詳情，可致電2411 8820或2411 8816。