基層團體請願 未能向林太交信

【明報專訊】新任特首林鄭月娥噚日第一日進駐特首辦，有基層團體就去到特首辦門口「熱烈迎接」林太，但緣慳一面，最終未能向特首遞交請願信。
香港社區組織協會噚日聯同一班街坊，上晝8點幾就喺特首辦門外大呼「早晨林太，我哋基層好想見你」，希望向特首遞交請願信，要求佢解決房屋問題，包括提供過渡房屋及推行租務管制等。不過，林太離開時只係遙遠揮手就上咗車，趕去9點港交所「債券通」儀式，並無經呢班基層代表企嘅位置離開，一眾示威者不滿，最後將信件拋入特首辦內（圖）。