譚文豪派3歲仔唱live撐HA

【明報專訊】音樂表演場地Hidden Agenda（HA）因違反地契多次被逼遷，文化界批評政府打擊工廈藝術發展，當局則強調公眾安全不容妥協，但就可以研究放寬低層單位做非工業用途。而正正位處工廈地下單位嘅HA，噚日就舉辦名叫This Town Needs Live嘅活動，邀請大約200人睇表演之餘，仲喺每隊樂隊嘅轉場時間練習走火警。


HA練走火警「快過立會」

公民黨立法會議員譚文豪亦有參與火警演習，佢喺facebook live入面話，利用前門同後門離開HA，分別只需要1分鐘同2分40幾秒，快過立法會大樓上次走火演習嘅10分鐘，證明HA嘅走火通道比好多地方都優勝。


facebook live尾段，譚文豪仲話要派代表唱番首歌，支持音樂表演，呢個代表就係佢囝囝、大約3歲嘅Ethan啦。Ethan喺片段入面攞住小結他唱ABC歌，台型十足，唔少網民都大讚可愛。