馮煒光去朝鮮 「耳根清靜」4日

【明報專訊】隨着上屆政府任期完結，唔少官員同政府要員都正式落任，而前政府新聞統籌專員馮煒光，將重操故業搞公關公司，但話先去三四個月旅行休息一下。佢去邊度玩一直故作神秘，噚日佢就喺facebook上載圖文，話已經出發咗去旅行，目的地係中國隔壁嘅朝鮮。


上唔到網前曬列車相

馮煒光噚日朝早8點幾，已經喺facebook發出多個帖文同上載多張出發去朝鮮旅行嘅相，其中一張喺火車站，佢身穿黃色褸，背景係來往平壤及遼寧丹東嘅列車。佢又上載咗由朝鮮發出嘅旅客卡（Tourist Card）相片，獲准入境。


馮煒光亦喺帖文提到，嚟緊會有4日時間上唔到網，可以「耳根清靜一下」，又話原來有好多人會過境去朝鮮做生意。