梁美芬擇日剪短髮 免選民認唔出

【明報專訊】Emily噚日中午突然見到立法會出現4個女人一個墟，經民聯梁美芬、民建聯蔣麗芸（Ann）同葛珮帆（EQ），以及工聯會麥美娟（Alice）圍埋一齊傾咗好耐，其間EQ又摸吓近日將髮尾電鬈咗嘅Alice，Ann姐又落手研究梁美芬個髮型，似乎4個女人都好在意髮型問題。
其中梁美芬近日剪咗個短髮，佢同Emily講，其實佢一直好想剪短髮，即使再短啲都仲接受到，因為之前嘅長髮搞到佢喺立法會讀稿時，不時都要撥頭髮。不過做「咁大轉變」，就要揀啱無選舉嘅日子，因為擔心影完選舉相但轉髮型，會令選民唔認得喎。至於Alice同EQ都話，佢哋嘅底線係唔會染髮。記得EQ曾經捐頭髮幫助癌症兒童，佢話要留番一定長度再剪去捐有困難，又話佢捐過兩次，現時間中都會收到有人將頭髮寄去佢辦公室請佢代捐。