粵港交水費也互聯互通

【明報專訊】金管局噚日同人行廣州分行搞咗個「粵港跨境電子直接繳費業務聯合發布會」，即係香港客戶可以透過網上銀行或手機應用程式，用人民幣交廣東省商戶嘅帳單，等客戶可以更靈活咁做網上繳付。其實好地地，香港人有咩大陸帳單張要交呢？


據了解，香港有9間銀行參與，大部分都係內銀，包括中銀香港（2388）、建行（0939）香港分行、集友銀行等，廣東省就有8間，包括廣發銀行、廣州銀行、中行（3988）等。收費商戶包括東莞市東江自來水公司、廣東省廣播電視網絡股份有限公司、廣東碧桂園服務公司等，應該都係交水費、管理費為主，似乎啱啲中港兩邊都有住家嘅人多啲。


指定銀行可網上繳款

金管局高級助理總裁李達志話，新服務為客戶提供多一個渠道交廣東省商戶發出嘅帳單，進一步推動跨境金融基建嘅發展。嗯，連交水費都互聯互通了。


[小琴密語]