李華倫急澄清冇再參與艾碩

【明報專訊】噚日打開報紙，一個全版廣告映入眼簾，原來係創業板新股艾碩（8341）創辦人兼大股東陳少忠登報講及公司近期股東之間爭拗事件。見到呢間公司名，小琴立即諗返起兩個月前有「股壇壞孩子」之稱嘅禹銘投資董事總經理李華倫（Warren Lee）接咗單Job，就係幫提出罷免艾碩全體董事嘅5位小股東做顧問。


既然同Warren有關，咁當然要八卦一下睇佢有冇料爆，點知佢劈頭就話「單Job要做嘅已經做晒喇，冇再參與喇」，但個全版廣告內容好豐富，講咗唔少嘢喎，Warren笑笑口話，篇嘢都係得個講字，各有各說法，又冇證據，只係引用部分報道文章，「之前都有雜誌就艾碩件事訪問過我，但個廣告又冇提喎」。


Warren又話，既然已經完咗個 Job就唔會評論呢件事，「不過成篇嘢，我會同意其中一句，就係佢話『對方僱用了素有股壇壞孩子之稱的高手出招』，哈哈」。哇，咁都俾你搵到位抽水兼讚埋自己，果然係高手呀。


[小琴密語]