房會25年 張炳良：房屋事務成DNA一部分

【明報專訊】身兼房委會主席嘅運輸及房屋局長張炳良，噚日最後一次以主席身分主持房委會會議，喺會議結束之前發表離別感言。佢話自己於1992年加入房委會，至今同房委會結緣四分之一個世紀，「房屋事務已經係我DNA嘅一部分」，仲話當佢卸任回復「平民身」之後，亦會繼續關注房屋事務，「有需要時會坐下（房委會）旁聽席聽會」。
話早年示威更激
張炳良憶述92年加入房委會時，先加入管理及行動小組委員會，負責處理同討論出租公屋事務，96年正式成為房委會委員，2000年因為發生公屋短樁醜聞，佢作為委員覺得需要分擔事件而離開房委會幾年，之後重返房委會，任職局長前正係擔任房委會資助房屋小組主席。
張炳良形容最初加入房委會時，每次開會場面都會好「熱鬧」，「逢開會必定有抗議，而且當時請願示威嘅力度較家高，仲試過有團體衝入房委會總部」，自此房委會總部大幅加強保安。
至於候任運房局長陳帆，張炳良話上星期起已經同佢交接工作，並介紹房委會嘅工作。政府噚日亦出稿宣布，陳帆將於7月1號起出任房委會主席。