吉利計劃炮製國產蓮花

【明報專訊】如果以後車行嘅賣車佬同你推銷一架國產跑車，你夠唔夠膽買？內地第一大民營車企吉利（0175）早排就收購咗馬來西亞汽車製造商寶騰49.9%嘅股權，亦都包埋英國老牌跑車製造商蓮花（Lotus）51%嘅股權。吉利董事長李書福噚日就豪言，公司未來可能會係中國生產蓮花。


吉利嘅呢單收購噚日喺馬來西亞首都吉隆坡正式簽約，收購完成後吉利會擁有對蓮花嘅絕對管理權。其實早喺今年2月，福建省就已經批准咗間叫Goldstar Lotus嘅合資車企喺福州起廠，吉利就持有呢間公司25%股權，睇來吉利為國產蓮花已經做咗好多工作。


李書福就話，會增加蓮花新產品嘅投放同埋擴大產量，「釋放佢嘅品牌魅力」。雖然小琴唔係汽車發燒友，但都知道就算跑車再酷炫，安全質素都喺好緊要，唔知國產蓮花喺呢方面可唔可以keep到蓮花原本嘅品牌嘅魅力呢？


[小琴密語]