重開後打風 昂坪纜車客跌25%

【明報專訊】昂坪360纜車為咗更換纜索，今年初停開到今個月5號重開，點知隔一個禮拜就撞正8號風球，之後幾乎落足10日雨，搞到纜車不時要停駛。昂坪360董事總經理關敏怡話，纜車重開頭兩個禮拜，只有4萬人次乘搭，比起舊年同期每日平均人數跌咗約25%。關敏怡話纜車服務恢復後，天氣持續不穩，加上部分海外遊客知道纜車重開後，家先陸續計劃行程，所以令乘客人數下跌。


關敏怡話昂坪纜車會喺暑假期間推出全新嘅節目「昂坪鼓舞飛揚大匯演」，同埋喺360舞台引入全新劇目《武動電影之幕後英雄》，會邀請3個自小喺河南少林寺接受訓練嘅年輕師傅演出，希望可以帶動暑假人流，吸引更多遊客搭纜車。