新九巴回歸「英倫風」 月底「行街」 設USB充電免費Wi-Fi

【明報專訊】巴士迷注意啦！新一代九巴將會喺今個月底正式投入服務。新九巴一改沿用10幾年嘅香檳金，改用紅色。九巴話呢隻紅色叫City Red，係經過特別調配，同九巴logo嘅紅色唔同。
首批約70部嘅新一代九巴將於年底前到港，陸續取代現有車隊。當中3條九巴路線會率先採用新巴士，市民今個月底就可以試搭，包括行走秀茂坪至尖沙嘴碼頭嘅1A線、屯門至灣仔嘅960線，以及新界北區至灣仔嘅978線。
新車除換上新顏色，亦增設12個USB充電插座，分別設於上、下層後座位置同輪椅泊位，九巴話除咗可以方便乘客，亦鼓勵市民上車後「行入啲」。
另外九巴正為巴士安裝免費Wi-Fi設備，下半年約1000部巴士可以提供免費Wi-Fi，每部裝置每日可以用兩次，每次15分鐘。未來幾年內九巴一半車隊、即大約2000部巴士都會有Wi-Fi提供。