耀才發短訊抽水兼撬客

【明報專訊】抽水呢樣嘢好講天分，好似耀才證券（1428）噚日就向廣大客戶send咗條短訊，話報章報道，有間「自稱一世免佣的證券行」創辦人兼行政總裁畀證監釘牌，叫客戶們留意，要查詢就可以搵番耀才咁話。呢招抽水兼撬客，真係維多利亞港都畀佢抽乾。


耀才呢條短訊，似乎係講緊近年瘋狂搶客嘅富途證券，皆因佢哋創辦人兼行政總裁鄔必海，星期一先畀證監出稿指佢喺上一間公司證星工作時違規，要釘牌半年。小琴同老友傾偈，個短訊叫啲客戶留意，有事可以搵耀才查詢，其實有乜好查詢吖，擺明係撬客。


小琴估計，炒友買股票只係睇系統效率，同埋佣金貴唔貴，唔會理個CEO發生咩事，所以溫馨提示短訊吸客效果應該麻麻哋，不過據講近年富途都搶走唔少傳統證券行客戶，今次有得抽水就梗係盡力抽啦！

[小琴密語]