CY林鄭周日赴京出席回歸展

【明報專訊】香港回歸20周年適逢政府換屆，政府噚日公布，特首梁振英（CY）同候任特首林鄭月娥星期日（25號）啟程前往北京，出席翌日（26號）舉行嘅「香港回歸祖國20周年——同心創前路 掌握新機遇」成就展開幕禮，據知佢哋二人前後腳搭飛機上京，入住同一間酒店，周一晚暫安排搭同一班夜機返港。


二人參加回歸成就展，預料中央領導都會出席活動，大家有機會喺香港七一慶回歸大典前碰面。CY於25至26號離港期間，政務司長張建宗會署任特首，隨CY赴京嘅官員，包括預料會過渡至下屆政府嘅財政司長陳茂波、環境局長黃錦星，同創科局長楊偉雄，至於唔會留任嘅政制及內地事務局長譚志源、食衛局長高永文及發展局長馬紹祥，亦會隨行。


青聯邀楊利偉 紅館倒數七一

另外，香港青年聯會（青聯）早前選出新一屆會董，佢哋同政府新班子一樣會喺7月1號走馬上任。青聯噚日搞傳媒茶敘，候任主席郭永亮透露，青聯6月30號晚會喺紅磡體育館搞倒數七一音樂會，除咗有中港台三地藝人表演，更請嚟國家首名升空太空人楊利偉現身，詳情有待公布。