父親節飲茶 尹兆堅為妻兒洗杯結帳 蔣麗芸每個周日都過節

【明報專訊】噚日父親節，唔少議員都同網民分享過節點滴，有議員送禮物兼陪爸爸飲茶，亦有議員變身「廿四孝老竇」陪仔女去玩。民主黨立法會議員尹兆堅就有特別嘅過節方式，先去拜祭父母，再同老婆仔女飲茶，不過，阿尹笑言點解慶祝父親節，但就要佢「駕車泊車」同「洗杯結帳」呢。
Emily話呢啲就係「廿四孝老竇」嘅表現，阿尹就話，自己對節日嘅繁文縟節已經無乜所謂，一家人一齊已經係最好嘅慶祝同祝福。
民建聯立法會議員蔣麗芸就同爸爸蔣震飲茶，Ann姐話每個星期日都係父親節，因為逢周日家人都會輪流同爸爸飲茶，晚上就一家大細一齊食飯同散步。Ann姐平日喺議會不時為大家帶嚟好多「花生」，佢拎住一包花生同爸爸合照，唔通覺得「花生」唔夠，要再添多啲？
工聯會立法會議員陸頌雄就送新電腦畀爸爸，話舊電腦「上網睇片facebook也不爽，小毛病又多，換台快一點好一點的」。