齊離開政府 譚志源搞歡送會 陳國基祝陳岳鵬科科100分

【明報專訊】本屆政府任期仲有唔夠兩星期就完結，其中政制及內地事務局長譚志源（Raymond）及其副局長陳岳鵬（Ronald）都會離開政府，當中Ronald已經提早離開，今日會飛美國到哈佛大學甘迺迪學院深造。前晚Raymond就設局搞歡送會，兩人一向人緣甚佳，除咗大批傳媒外，唔少前官員、政界人士都有出席，似乎熱鬧過日前立法會設宴歡送特首梁振英。候任特首辦主任陳國基就祝願Ronald科科100分，更表明希望對方畢業後重返政府繼續服務社會(口添)！
當年Raymond做特首辦主任時，就力邀Ronald擔任特首辦特別助理，前晚聚會亦有唔少前特首辦官員出席，好似現為港大醫學院院長嘅前特首辦主任梁卓偉、當年喺特首辦做助理新聞處長嘅政務官丘卓恒等。丘卓恒亦讀過Ronald即將修讀嘅課程，佢形容「曾蔭權集團」都會修讀呢個課程，因為前特首曾蔭權、前財爺曾俊華等亦有修讀，透露當Ronald問佢意見時，佢都好鼓勵對方修讀，但作為師兄嘅佢就叫Ronald到時唔好太努力讀書喎。
副食物及衛生局長陳肇始就大讚Ronald係一眾政助（當年Ronald做政制局政治助理）中最好嘅一個，作為哈佛校友嘅陳肇始就透露哈佛其實係有110分、120分嘅，即100分唔係滿分，十分搞笑。