流動創作教室穿梭40中學 傾偈畫畫 盼學生增互相了解

【明報專訊】藝術可以拉近人同人嘅距離，亦可以加深彼此認識。視覺文化博物館「M+」嘅流動創作教室「M+敢探號」進入中學校園，同學生傾偈兼畫畫，希望同學仔可以更了解自己同人哋。


M+敢探號呢個名參照咗登陸星球嘅探測車而得來，寓意帶領學生探索未經開發嘅創意領域。呢項計劃每年邀約唔同範疇嘅創作人參加，好似藝術家、建築師同電影導演等。M+用8米長嘅拖車，改造成流動教室去唔同中學；今年主題係「天下無雙」，希望學生欣賞每個人有獨特之處，流動教室喺2月至6月去咗40幾間中學推廣。


今年合作嘅藝術家係本地繪本作家李香蘭（原名梁曉文），佢話中學時坐唔定，係老師眼中嘅反叛學生，家成為繪畫老師，就想用自由嘅方式教育下一代，引導學生發揮創意，而唔係鬥畫畫靚。佢喺車身畫上白花同綠葉等，又喺車內擺植物同豆袋梳化等，整到好似個咖啡室咁，令學生可以輕鬆傾偈了解大家，跟住再幫身邊同學畫肖像。


M+敢探號會喺本月30號到香港文化中心，到時市民可登車體驗一下。