錄音流出 指「大眾白癡㗎嘛」 鄭松泰﹕要同梁游扮friend

【明報專訊】網絡KOL「無敵神駒」仇思達前晚喺自己嘅網台直播節目中，播出一段熱血公民立法會議員鄭松泰（圖）喺內部會議嘅「絕密錄音」，當中鄭松泰爆粗怒斥青年新政梁頌恆同游蕙禎「X你，你哋應該死啦XXX」，又話自己要喺公眾面前「同佢哋扮friend」、「係要畀其他人覺得我哋幫緊佢哋，因為啲大眾白癡㗎嘛！」

梁頌恆﹕唔評論花邊新聞

鄭松泰喺facebook證實錄音屬實，指「有手足沒有遵守黨規和破壞內部溝通指引，本人深表遺憾……（講話）沒有什麼是不可對人言的」。佢仲補充話，喺立法會選舉中「有份支持梁、游，而令教主黃毓民敗選的人，全部都是智力有問題」。


鄭﹕佢哋以為我哋係本土派

梁頌恆回覆Emily查詢時話：「香港被侵略日益嚴重，目前有限心力只能專注官司及爭取國際對香港的支持，唔評論其他花邊新聞。」


根據「絕密錄音」，鄭松泰怒斥梁、游，提到有市民誤以為梁、游與熱血公民同屬一個派系，「佢哋（市民）以為我哋係本土派呀！以為本土派係同一批人嚟，有人以為我係青年新政，你明唔明呀，喺加拿大時」。


錄音一播出，網上群情洶湧，不同嘅本土派系互相攻擊，火藥味極重。大批網民亦去到鄭松泰facebook帳戶留言，斥鄭「侮辱選民」，亦有人表明支持鄭，叫佢盡快「捉鬼」。