迪士尼推 T恤DIY 圖案信息自己揀

【明報專訊】香港迪士尼樂園又趁暑假有新搞作，下個月會推出超過1000種商品，數量係歷年最多，當中包括「Disney Tee Program」，畀顧客自己揀圖案，喺T恤印名同自訂信息。樂園商品營運綜合策劃經理Justin話，迪士尼本身有個人化電話殼，可以畀人印名，嚟緊嘅自選T恤圖案配搭約有70種，除咗名，仲可以印自訂文字同日期，T恤分大人、細路同BB尺碼，最快兩個鐘就有製成品。
Justin又話，徽章同樂日今年想發大嚟搞，7月8日會推出「Pin Hunting 2017」活動，只要根據提示去唔同園區買齊7款徽章（限量500個），就可以換領非賣品紀念徽章。另外，8月4至5日會首次舉辦「Pin Trading Night」，推出多款怪獸公司限量版徽章。 Emily聽聞，喺東京大受歡迎嘅「Ufufy」系列毛公仔同新角色「StellaLou」都會喺今年暑假嚟到香港迪士尼。