譚志源寄語下任局長　「重啟政改須多溝通」

【明報專訊】政制及內地事務局長譚志源仲有不足一個月就卸任，佢噚日去新城電台為節目錄音之後見傳媒，話自己7月至9月都會去旅行，9月底返香港「睇睇有無人聘請我」。佢又寄語下任局長，一旦要處理政改問題，要小心考量客觀條件，係咪已經到位可以重啟政改，「要重啟政改，下屆政府首先必須多做溝通工作」。


坊間已經有唔少報道披露新班子名單，譚志源話唔知道新班子嘅具體人名，話報紙所揣測嘅名單如果係真嘅，「我會覺得好高興」，話新班子中好多人都有才華，喺政府多年工作裏面都顯示佢哋嘅承擔同智慧，「我覺得如果一如報紙所載嘅話，我對新班子係充滿期望」。


中大學生會早排就六四發嘅聲明，引起唔少討論。被問到對時下年輕人看待六四有咩睇法，譚志源話，後生仔熱愛成長嘅地方係正常嘅事，但鼓勵年輕人有機會可以去內地睇睇，睇吓內地最新發展，好嘅要去睇，唔好嘅要去睇，之後先落定論。