七一遊行維園草坪出發 民陣：有混亂鄭耀棠警方責無旁貸

【明報專訊】今年康文署唔批准民陣以維園足球場作為七一遊行起點，只係批准民陣租用維園中央草坪同音樂亭做起點。民陣噚日同警方召開第二次會議，商討遊行安排。民陣建議銅鑼灣一帶做第二個起點，以便減低排隊等起步嘅時間，但警方堅持遊行需要喺維園草坪開始。民陣召集人區諾軒話，到時球場有慶回歸活動打對台，如果有任何混亂，慶委會執行主席鄭耀棠同警方責無旁貸。


民陣表明，會喺警方發出不反對通知書之後提出上訴。民陣建議喺波斯富街、或記利佐治街、東角道做第二起點做分流，但警方堅持要所有人走入維園草坪先可以維持秩序。


其實近年唔少參加七一遊行嘅市民都喜歡喺銅鑼灣中途加入，民陣認為根據警方安排，只會令更多市民選擇喺銅鑼灣出發。區諾軒話，維園仍然有象徵意義，呼籲市民一齊喺維園草坪起步，但市民亦可以沿途加入，解決起點空間不足嘅問題。