應徵天文台 李本瀅由李小龍胞兄面試

【明報專訊】前天文台長李本瀅前日發表網誌，細說佢喺天文台工作嘅往事，原來佢當年應徵天文台科學主任，係由李小龍胞兄、做過天文台助理台長嘅李忠琛面試，結果過關，否則天文台嘅歷史就會被改寫。


李本瀅話，李忠琛於1960年代後期喺電視亮相，電視台介紹佢係科學主任，但佢講嘅竟然係劍擊。李本瀅當時心諗，搞科學嘅人又會咁好動，令佢對天文台工作產生興趣。


到咗1970年代，李本瀅決定應徵科學主任一職，首兩次都唔成功，第三次面試佢嘅人就係李忠琛，問咗啲佢唔識答嘅電子應用問題，好在當時李本瀅嘅正職係電腦程序員，有關電腦程式嘅提問總算過關，最後成功加入天文台。


李本瀅話，一般人對李忠琛嘅認識，只限於佢係李小龍哥哥，原來佢做嘢好認真，例如颱風襲港時，李忠琛對颱風信號運作嘅熟練，以及署任天文台長時指揮若定，都令李本瀅印象深刻，唔怪得之到佢做台長嘅時候（2009年至2011年），都建立到處變不驚嘅形象啦。