各界青少年活動委員會慶回歸 青年變布景板 陸頌雄抱不平

【明報專訊】回歸20周年，唔少團體都大搞活動慶祝。香港各界青少年活動委員會噚日朝聯同多個團體舉行「為夢想出發」青年活動啟動禮，邀請學者演講，仲有中聯辦主任張曉明做主禮嘉賓。
不過，活動嘅主要對象青年人，上台就做人肉布景板，呢項活動嘅安排，連作建制派嘅工聯會立法會議員陸頌雄都話自己「政治不正確」，要公開「吐槽一下」。
Emily問陸頌雄有咩嘢睇唔過眼，佢就話其實佢噚日無份出席活動，但有朋友即時傳相同活動狀况畀佢睇，佢就話搞青年活動，青年係主角，但噚日朝早，大多數青年都要返學，因為6月份係考試季節，又或者要返工，唔知大會點樣安排青年參與。佢話如果搞活動，通常揀周六周日，或者周五晚先方便到人參加。
大會公關未有回覆
陸頌雄話，睇番噚日嘅活動資料，大會安排重量級學者演講，如果有更多青年有機會聽到，效果一定更好。
陸頌雄見到啲相片就喺facebook話，「整個畫面，青年人都在旗幟後面，群眾主體在哪？」陸頌雄同Emily講，唔知係家啲青年唔鍾意上鏡，定係大會安排咁樣企位。Emily就打畀大會公關了解，但就暫時未有回覆。
今次活動主題喺「為夢想出發」，而陸頌雄就話，好多青年人夢想其實好簡單，可能係30歲前成家立室買到樓住，所以唔使成日用高大空嘅「夢想」做青年活動主題喎。