佳叔新書講香港獨特政治形態

【明報專訊】全國港澳研究會副會長劉兆佳又推出新作，書名為《回歸後香港的獨特政治形態：一個自由威權政體的個案》（圖）。佳叔提出香港係個自由威權政體，即係混合政體嘅其中一種，但政治形態同其他同屬混合政體嘅地區好唔同，可以稱得上係「獨一無二」。


佳叔同Emily講理論，話唔可以直接套用西方嘅政治理論去分析香港政治，要連繫埋佢嘅歷史背景同內外環境，「我一向以香港為一獨特地方來研究，西方理論只作啟發思考之用」。


佳叔喺書序話，自己2012年離開政府中央政策組之後寫咗4本書，分析香港嘅政治形態同變遷。而新書係4本書嘅「『整合性』總結之作」，將會透過本港不同政治現象同埋外國例子，互相對照，了解香港嘅政治現况，同探討可以改變目前格局嘅方向。


佳叔話寫完呢本書之後，佢會暫時放低寫書嘅工作，專心寫學術文章發表研究成果同心得。佢又盼望香港嘅「動態政治僵局」可以早日搵到出路，恢復和諧穩定局面。