德領事館教造句﹕人民不應忘記歷史

【明報專訊】德國駐港總領事館每個星期都會喺facebook page教吓網民德文生字，Emily都好鍾意睇，事關啲生字好多時有深層意思，且同香港息息相關！噚日總領事館教大家「忘記」嘅德文係「vergessen」，仲以「人民不應忘記歷史」作為例句，全句德文係「Die Geschichte sollte nicht vergessen werden」，配上一個「一臉迷惘」嘅腦袋公仔（圖），亦教埋大家點樣發音。


咁啱噚日係六四28周年，早排港大民意研究計劃調查顯示有27%市民表示唔支持平反六四，係2006年以來新高，又有大學學生會講到明唔會舉辦或者參與任何六四相關活動。網民一見德國領事館個post，即刻無限聯想，領事館出post 9個鐘後已經有4000幾人like同超過1600人share，有網民留言話「睇見德國點對待二戰歷史，呢一句說話簡直係擲地有聲」；亦都有人話「德國領事館都提醒香港人勿忘六四，香港就有些自稱『本土』的人叫人唔好『死攬』六四」。