政團維園籌款 少「奉獻」支聯 公民黨撥一成畀主辦單位

【明報專訊】每年六四晚會，唔少政團會喺維園外擺攤位籌款，而不論喺維園內外擺籌款攤位，有個「江湖規矩」，大家會將一成款項畀番主辦單位。噚日Emily喺晚會前圍繞維園外行咗一圈，政團都擺好攤位，但似乎唔係好多人捐款，可能仲早啦。Emily好奇呢啲政團籌款仲會唔會畀番一成支聯會，就逐個逐個問，包括新民主同盟、香港眾志、人民力量、小麗民主教室、公民黨、社民連同工黨。
香港眾志常委林淳軒話個攤檔擺喺維園外，所有收益都會撥番畀黨；新民主同盟成員譚凱邦都係一樣咁講。其實咁多個政團入面，除咗公民黨話會撥一成畀支聯會外，其餘都話歸黨。Emily就覺得有啲奇怪，如果喺六四晚會擺攤檔，咁點解會將所有收益都畀番所屬組織呢？
除咗政黨，支持港獨嘅組織「學生動源」喺銅鑼灣東角道擺街站宣傳港獨，有成員同Emily講「擺明抽支聯會水」，而喺銅鑼灣擺街站，係因為「人流多，想有最大（宣傳）效果」，佢又話六四畀港人最大嘅教訓，就係香港要獨立先有生路喎。