國泰擱置空服員名牌加中文名

【明報專訊】空姐空少唔易做，除咗要派餐，仲要兼顧乘客安全、滿足佢哋要求，日前國泰航空發出內部通訊，要求香港、台灣空中服務員嘅名牌，由只有英文名，改為中英對照。Emily收到風，措施引起同事爭議，好多人都驚因為咁而畀人網上起底。


國泰空中服務員工會主席胡綺薇話，消息一出，工會收到幾十個投訴，可見政策具爭議。胡綺薇講起，就算用英文名，客人想投訴或者稱讚空中服務員，只要提及乘坐嘅航班班次，都可以搵番嗰個員工；加上社交媒體盛行，同事擔心一出中文全名，若有人喺網上起底發泄，擔心私隱毫無保障之餘，亦驚有人會追查到佢哋入住嘅外地酒店，甚至威脅人身安全。


Emily睇過唔少飛機爭執、打鬥嘅短片，唔少喺網上瘋傳，hitrate勁高，空中服務員有時成為主角，或者唔小心入鏡，有擔心都唔係無道理。國泰航空就回應話，有關機艙服務員制服名牌印上中文姓名嘅建議，公司因應同事反映嘅意見，已暫時擱置有關計劃，並會繼續與同事溝通，了解佢哋嘅關注。今次國泰擱置新建議，睇嚟都真係聽到員工反彈聲音。