何君堯耍八段錦慶回歸：男人過咗50雙腿好重要

【明報專訊】4000人同耍 盼破健力士
香港廣西社團總會噚日喺維園舉行「活力慶回歸，全城八段錦」活動，搵咗近4000人一齊耍八段錦，要打破健力士「最大型氣功學習班」嘅世界紀錄。剛剛競逐律師會理事失敗嘅立法會議員何君堯都有參加，佢心情似乎無受敗選影響，仲應記者要求，即場耍八段錦，54歲嘅佢話慶幸細個學過幾招，身體依然健康，行路無腳步浮浮。
噚日天氣非常好，下晝兩點幾天文台喺跑馬地一帶錄得31℃高溫，維園上空仲萬里無雲。近4000個參加者中，有小朋友同年輕人，但大部分都係中老年人，雖然個個都「全副武裝」上陣，戴晒帽同太陽眼鏡，但要喺烈日當空下耍35分鐘八段錦，都咪話唔辛苦。Emily喺急救站都見到幾個長者唔舒服，要擦藥油休息。
候任特首林鄭月娥都有出席活動開幕儀式，但之後就無一齊耍八段錦，只係同參加者揮手打招呼，之後就離開會場。
何君堯有出席活動閉幕儀式，儀式前唔少人拉住佢合照。何君堯話，用平常心面對敗選律師會理事選舉，強調自己會繼續喺律師會各委員會內工作。
何君堯仲即場耍咗幾招八段錦，笑言男人過咗50歲，雙腿好重要，因為一旦企唔穩，「跣親就好大鑊」。