代周浩鼎 漁農界何俊賢料入UGL委會

【明報專訊】民建聯周浩鼎早前退出立法會調查UGL專責委員會，以平息政治風波，立法會內委會噚日決定下周五喺內會提名同補選呢個空缺。獨立毛孟靜喺會上指摘建制喺委員會中已經佔多數，要求民建聯唔好諗住個位係「世襲」，搵番自己人出嚟頂替。民建聯蔣麗芸同樣唔客氣，鬧個委員會係吹水會，「無控方、無辯方、無證人，靠乜去查呢？靠想像力呀？」佢又明顯有備而嚟，突然舉出林卓廷同梁繼昌嘅大頭相指摘佢哋，搞到內會又陷入混亂。


其實民記已決定推薦漁農界議員何俊賢接替黨友位置。佢噚日直認民記高層前兩日親自問過佢意向，而自己最終評估過工作量同能力之後，同意接受呢個挑戰。佢笑言可能係因為自己處事公道。


周浩鼎辭職亦令委員會副主席懸空，咁何俊賢會唔會頂埋？佢話加入委員會已經好大壓力，暗示無意兼任。今次係何俊賢第一次入專責委員會，佢話：「我係來學嘢嘅。」


泛民方面，雖然對補位戰已打定輸數，但認為都會搵人對撼，唔可以輕易畀建制過關。Emily聽聞，唔少人都希望平時口才了得嘅社民連梁國雄加入戰場，不過就未知佢意下如何。