「6屆元老」鄭耀棠 將續選人大代表

【明報專訊】今年底港區人大代表將會換屆，預料36名港區人代中，將有約三分之一會退下火線，唔尋求連任。由1988年、第七屆人大起已當選港區人代至今嘅工聯會榮譽會長鄭耀棠，係港區人代中最資深一個，計埋現屆已經做咗6屆。目前68歲嘅佢噚日表態，年底仍然會參選人代，但表明無意做人大常委，佢話人大代表可以發揮作用，但做常委就有限制。


今屆政府任期即將完結，棠哥就評價特首梁振英（CY）真係做到嘢。CY任內幾項勞工政策都無落實，好似取消強積金對冲機制、劃一勞工假期同標準工時咁，但棠哥就為CY平反。棠哥形容勞工政策係「天生有爭鬥」，好似對冲本身有問題，但錯咗後要CY「撥亂反正」，難度非常大，形容CY唔可以「隻手遮天」，而處理勞資問題，工人滿意老闆就唔高興，反之亦然，所以最重要係雙方可唔可以互諒互讓，又話事件被政治化，最終只會損害勞工利益。


至於近日CY連日攻擊泛民議員梁繼昌，棠哥就就引用歌詞形容CY「忍無可忍的時候，我會挺身而出」，批評泛民做得太過分。對於目前立法會調查UGL委員會點收科好，棠哥就建議解散委員會從頭再來最好，因為梁繼昌喺委員會將會影響公信力。