中大膺慳神 3年慳3000萬電費

【明報專訊】噚日環境局同機電工程署舉行第一屆「慳神大比拼2016」頒獎典禮，目的係表揚過往3年持續慳電嘅團體。中文大學奪得3個獎項成為大贏家，分別係全場總冠軍、講創意嘅「慳得至醒慳神獎」，同專上教育院校組別冠軍。原來同2012至13年比較，中大喺2015至16年嘅總用電量減少差唔多一成，3年入面慳咗相當於3000萬蚊電費嘅能源！
推獎勵計劃　達標回贈現金
Emily都好好奇，到底中大點慳到咁多電費，物業管理處能源經理莊錦輝話，除咗全校街燈用咗LED燈，仲落咗好多功夫鼓勵慳電，例如3年前推出「節約能源獎勵計劃」，為教學同行政部門定慳電目標，達標嘅部門，學校將慳到嘅電費按比例畀番現金回贈！