「車長瞓欄杆」相熱爆 九巴趁機宣傳

【明報專訊】網上早前熱傳一張九巴車長瞓喺巴士站欄杆上休息嘅相，老實講，條欄杆咁幼，要企好唔郁都難，佢仲瞓得咁爽，即時被網民大讚係高手，有網民仲聯想起金庸名著《神鵰俠侶》中嘅古墓派功夫，封佢為「現代楊過」；亦有網民分析，咁樣瞓唔止要平衡力夠好，而且仲可能要一直用股溝夾實，肯定功力深厚咁話。


網民讚「現代楊過」好功夫

呢個高手真實身分至今仍係一個謎，但佢所屬嘅九巴，其公關噚日就把握機會，趁呢張相瘋傳期間，喺官方facebook出post宣傳，仲話「無論係古墓派定關公，練得一手好技術，服務大眾，這些機會真係屬於你㗎！」擺明食住個勢招「高手」做車長。


呢個post附有一條短片，唔少人以為片中車長就係「現代楊過」，點知睇完先發現中伏，原來係九巴搵咗幾個車長講番服務乘客嘅感受。最特別係其中一個受訪兼職車長嘅正職係民航機師，真係估你唔到嘅高手。不過，唔少網民都建議九巴應該改善車長福利，特別係增加休息時間先係最實際。