湯家驊：若幫到政府 當然應考慮入行會

【明報專訊】民主思路湯家驊盛傳已獲邀加入候任特首林鄭月娥政府嘅行政會議，但佢未有回應，噚日湯家驊就接受電台訪問，話「如果」有人認為佢嘅專長可以幫到政府施政，佢作為社會一分子，當然應該考慮。


話從政者不能永遠做反對派

湯家驊話，行會成員係用佢嘅專長為政府提供中肯意見，佢覺得行會成員嘅角色係顧問，又認為泛民加入行會嘅作用，比司、局長更加大，因為司局長只係負責某部門同範疇嘅政策，但行會成員就係對整個管治走向有貢獻，可以海闊天空咁提出唔同意見畀政府。佢強調，從政要以執政為目標，即使唔能夠執政，但有建設性地影響施政，都應該係任何從政者目標之一，唔可以永遠做反對派，即使唔能夠執政，亦都要有建設性地影響施政。


主持人提到，以湯家驊咁勇於嘗試嘅性格，如果獲邀相信應該會加入行會，湯家驊無否認呢個說法，但再三強調前提「如果」。佢話如果新一屆政府希望建立包容度高嘅班子，唔同政見人士都應認真考慮加入，盡責任修補社會撕裂。