Cue后吳安儀拍片 講積金複息效應

【明報專訊】相信唔少打工仔都覺得，每月供強積金都好似唔見咗嚿錢咁，好似供嚟供去都無乜進帳，強積金早前就喺「滾續達人」facebook專頁推出短片，講複息效應喺儲蓄同投資上嘅威力。講呢啲題目未必有趣，但短片就搵咗有「四眼Cue后」之稱嘅世界女子桌球錦標賽冠軍吳安儀，以及YouTuber司徒夾帶同魔術師Miss Hunny幫手拍，似乎都成功吸睛。


短片講述吳安儀想知道點樣先可以拎到多啲網上支持同Like，司徒夾帶就教，其實儲Like同儲強積金一樣，都係需要時間，本月供款嘅本金會賺回報，回報之後亦會成為本金，連本帶利咁一路增值，時間愈耐，強積金供款亦會愈滾愈大，咁就係複息效應。司徒夾帶喺片尾就話，效應都要視乎投資產品，都要留意投資風險同預期回報，佢哋又呼籲後生仔盡量儲蓄同做好強積金投資。