朱凱廸鄉紳同枱食飯無嗌交

【明報專訊】有無見過平日勢不兩立，經常炮轟「官商鄉黑」勾結嘅朱凱廸同鄉議局成員同枱吃飯吹水？Emily噚日喺立法會就真係見過啦！話說鄉議局一眾鄉事委員會主席噚日去立法會，出席一年一度同立法會議員閉門會議兼午餐會，交流鄉郊議題。出席嘅民主派雖然只有三四個，不過一向有關心新界事務嘅朱凱廸同姚松炎就留足全場。
雖然朱凱廸搞橫洲抗爭令到唔少鄉紳好㷫，不過噚日佢坐喺錦田鄉委會主席鄧賀年及厦村鄉鄉委會主席鄧勵東中間，都無開火，算係理性交流。朱凱廸笑住話，雖然一開始感覺對方有啲惡，但都覺得氣氛算良好。大家之後仲交換電話，朱凱廸話，睇吓之後有無機會搵對方幫手約吓棕地上嘅貨櫃團體見面。朱凱廸又喺會上誠意提出，希望鄉議局可以內部改革，增加透明度同提高公信力等，不過佢就覺得對方唔多聽得入耳。