律師會改選 任建峰何君堯爆罵戰

【明報專訊】法政匯思任建峰3年前發動對時任律師會會長林新強不信任動議而成名，本月26號律師會改選其中5名理事，有8人報名競逐，任建峰近日就撰文，呼籲會員唔好投票畀有份競逐嘅立法會議員、律師會前會長何君堯。何君堯不甘示弱，要求對方收回言論及發道歉聲明。


任籲勿投何君堯 何批誹謗促道歉

任建峰喺《蘋果日報》發表題為〈一票不投何君堯〉文章力數何君堯「7宗罪」，包括質疑何君堯無視檢控獨立，話對方喺旺角騷亂、佔中「公民廣場」案判決後，向律政司長指指點點，要求用某啲控罪就判決上訴；又指何曾喺法庭門外自拍，批評對方無視司法機關；又話佢侮辱女性，曾喺《城市論壇》公開建議同場另一女嘉賓除衫等。


何君堯就喺facebook反擊，形容自己「從來不怕真小人，更無懼那些偽君子！」佢話深信律師會改選，有競爭先有進步，但必須係君子之爭，佢話任建峰對佢作出嘅7宗罪指控，「全部都是失實無據的惡意誹謗」，強調自己喺立法會更能為法律界利益把關，行使言論自由權利，並無干擾到律政司獨立檢控等，又話自己無藐視法庭，亦無對女性同性小眾不恭。佢表明會嚴肅處理事件，要求對方立即收回所有誹謗言論，及作合乎佢要求嘅道歉聲明。