乳鴿話「白鴿問題嚴重」惹笑話 許智峯：預咗人笑

【明報專訊】民主黨一向有「白鴿黨」之稱，而黨內「乳鴿」、兩名中西區區議員許智峯及吳兆康，近日喺區內貼海報，標題係「白鴿問題越趨嚴重」，結果喺網上變成笑話，有網民笑佢哋「白鴿黨話太多白鴿」，又有人認同話「係好大問題」，又話海報上提到同動物「和諧共存」口號好配合民主黨路線。許智峯就同Emily講，出呢張海報預咗畀人笑，但如果有人留意到問題都無妨喎。


出海報話鴿屎影響衛生

許智峯話，舊中環街市一帶成日有唔少鴿聚集，有啲人會餵飼，但鴿屎會惹起衛生問題，所以提出關注，要求跨部門合作處理。佢喺海報上提出，要求用鳥網、鳥刺等工具對付雀鳥，咁會唔會又引起動物權益人士嘅關注呢？


提倡動物友善政策嘅黨友「鄺神」鄺俊宇就話，其實外國有唔少唔會傷害動物嘅方法可以減少飛鳥聚集，會搵機會同許智峯研究一下。鄺神又抽水話，作為動物權益發言人，佢都要好好保護「乳鴿」黨友喎！


許智峯就話，佢雖然提出處理飛鴿問題，但亦提出「和諧共存」原則，又話上網睇過，佢提出嘅鳥刺只係一啲凹凸裝置，等雀鳥唔可以喺安裝位置站立逗留，應該唔會傷害到佢哋。